Sabtu, 10 Agustus 2013

Teks doa-doa HR SP Maria Diangkat ke Surga - bahasa Batak Toba



ARI REA MARIA TARHINSAT TU SURGO
(15 Agustus)


HATA PAMUNGKA

Sadarion tareahon do Maria tarhinsat tu surgo. Diajarhon Huria i do ia Inanta Maria na so marlindang jala ias sian dosa dung simpul saluhut ulaonna di tano on marmulia do. Alanii tarhinsat do ibana tu hamuliaon surgo rap dohot pamatang nang tondina.

Dipatimbo Tuhan ido ibana songon Jesus, anakna, naung manaluhon dosa dohot haholomon. Asa ari rea on gabe sada panghirimon na balga do di hita na naeng mangajari hita mangihuthon tiruan na denggan na binahenna huhut asa lam marpangusandean hita tu Tuhan i, songon Inanta Maria di tingki ngoluna di tano on.


TANGIANG PAMUNGKA

Ale Debata Namarhuaso jala na manontong, Inanta Maria na so habubuhan nunga tarhinsat tu surgo di bagasan hamuliaon rap dohot pamatang nang tondina. Hupangido hami, patubu ma roha di hami laho mangeahi hangoluan na di ginjang, asa tama hami taruli di hamuliaonNa. Marhitehite Jesus Kristus, Tuhan jala Sipalua hami, na marsada dohot Ho di bagasan Tondi Porbadia, na mangolu jala mangarajai, Debata, ro di saleleng ni lelengna.

R. Amen.


TANGIANG HATOPAN
M:        Marhite Inanta Maria, mian do Debata Ama di tonga-tonganta di bagasan Kristus AnakNa i. Di bagasan pangurupion ni Inanta Maria tapasahat ma angka tangiangta asa lam tatanda Debata marhite Jesus, AnakNa i.

1.      Tatangianghonma Amanta Paus, Uskup dohot angka Malim. Ale Debata, dongani ma Amanta Paus, Uskup dohot angka Malim asa tongtong margogo nasida laho marmahani ruasMu mardongan haporseaon na togu songon Inanta Maria tingki manjalo tohonanna gabe Ina ni Sipalua i. Martangiang ma hita...

2.  Tatangianghon ma partogi ni masyarakat. Ale Debata, patiur jala dongani ma partogi ni masyarakat nami mardongan sondang ni holongMu asa sude ulaon dohot panghobasion nasida tongtong diulahon mardongan holong dohot serep ni roha songon Inanta Maria. Martangiang ma hita...

3.   Tatangianghon ma angka inanta. Ale Debata, sai anggiat ma angka inanta mamereng tiruan na denggan ni Inanta Maria di na laho mangaradoti ulaon nasida di ruma tangga. Martangiang ma hita...

4.   Tatangianghon ma dirinta sandiri. Nang hami pe ale Tuhan, patogu ma haporseaon, panghirimon dohot holongnami asa lam tolap hami manaluhon angka ulaon na so ture mardongan holong. Anggiat ma marhite i lam boi hami mandok mauliate di ganup parngoluan nami jala mamuji habasaonMu. Martangiang ma hita... 

M:        Ale Debata Namarhuaso jala na manongtong, mandok mauliate do hami ala naung tarhinsat Inanta Maria tu surgo mardongan hamuliaon. Porsea do hami pasautonMu do janjiM tu angka na porsea tu Ho, ima hatuaon na saleleng ni lelengna. Tangihon ma tangiangnami on marhite Kristus Tuhan nami.


TANGIANG PASAHATHON SILUA

Ale Debata, sai jalo ma siluanami on songon tanda haradeon ni rohanami mangihuthon tiruan haporsean ni inanta Maria na tarhinsat tu surgo. Mardongan las ni roha alani api ni holong, manghirim do hami laho marsada dohot Ho sogot. Marhite Kristus Tuhannami.

R. Amen.


TANGIANG DUNG KOMUNI

Martangiang ma hita.
Ale Debata Nasunbasa, nunga hujangkon hami sakramen haluaon marhite Ekaristi Nabadia, ima pelean ni AnakMi. Hupangido hami tu Ho, sai anggiat ma marhite tangiang ni Inanta Maria na tarhinsat tu surgo di bagasan hamuliaon, taruli ma hami di hamuliaon haheheon ni AnakMi. Marhite Jesus Kristus, Tuhannami, na mangolu jala marhuaso, ro di saleleng ni lelengna.

R. Amen.


Terjemahan bebas sian:
Buku Misa Hari Minggu dan Hari Raya,
Komlit Keuskupan Agung Semarang,
hlm. 1664-1671.

Sdr. Cypriano Barasa, OFMCap.

Tidak ada komentar:

Poskan Komentar